Тошкентда Ўзбекистон Пенсия жамғармаси раҳбарияти ва Қирғизистон Ижтимоий жамғармаси вакиллари ўртасида учрашув бўлиб ўтди. Унда икки мамлакат пенсия таъминоти тизимлари, амалга оширилаётган ислоҳотлар ва келгусидаги ҳамкорлик масалалари муҳокама қилинди.
Учрашув якунида давлат ижтимоий суғуртаси ва пенсия таъминоти тўғрисидаги битим ҳамда уни амалга ошириш бўйича маъмурий келишув лойиҳалари бўйича келишувга эришилди. Ушбу битимга кўра, фуқаролар пенсияларни тайинлашда суғурта стажини жамлаш имкониятига эга бўлади.
Шунингдек, пенсиялар яшаш мамлакатидан қатъи назар тўғридан тўғри тўлаб берилиши ва етказиб бериш харажатлари ушлаб қолинмаслиги белгиланди. Бундан ташқари, хизмат сафарларига юбориш ва уларнинг муддатларини узайтиришда икки томонлама ажратмалардан қочиш имконияти яратилади.
Битимнинг асосий мақсади Ўзбекистон ва Қирғизистон фуқаролари учун пенсия соҳасида тенг ҳуқуқларни таъминлаш ҳамда суғурта бадалларини икки марта тўлаш амалиётини истисно этишдан иборат.