Қибрайда 30 йиллик дарахтлар кесилди: аҳоли норозилик билдирмоқда
Гувоҳларнинг айтишича, дарахтларни кесишда ҳокимият вакиллари бўлган, аммо рухсатнома тақдим этилмаган.
Ижтимоий тармоқларда Қибрай тумани, Ботаника маҳалласидан туширилган видео тарқалди. Унда ёши 30 йил ва ундан ҳам катта бўлган дарахтларнинг оммавий тарзда кесилаётгани акс этган. Гувоҳларнинг айтишича, воқеа жойида милиция ходимлари ва туман ҳокими бўлган, бироқ кесишга рухсат берувчи ҳужжатлар ва расмий изоҳлар тақдим этилмаган.
Маҳалла аҳолиси бу ҳудудда яқинда янги дарахтлар экилганини, мунтазам суғориш ва ҳудудни тозалаш ишлари олиб борилганини таъкидлашмоқда. Аммо бир неча соат ичида барча дарахтлар кесилиб, яшил ҳудуд бутунлай йўқ қилинди.
Аҳоли воқеани тўхтатишга ҳаракат қилган, лекин бунга эриша олмаган. Уларнинг айтишича, кесиш ишлари ҳокимият топшириғи асосида олиб борилаётгани айтилган, аммо расмий фармойиш кўрсатилмаган.
Маҳаллий фаоллар воқеа юзасидан прокуратура ва Экология вазирлигига мурожаат қилган, аммо уларнинг айтишича, бирор вакил воқеа жойига келмаган. Ҳозирча расмий идоралар томонидан ҳолат юзасидан изоҳ берилмаган.
