Қорақалпоғистон Республикаси ва вилоятларда 44та янги экспортбоп узум плантациялари яратилади

 

 

Қайд этилишича, бугунги кунда мамлакатимизда узум етиштириш бўйича қадрият даражасига етган тажрибани янгилаш, соҳага замонавий технологияларни олиб кириш, маҳсулотнинг янги турларини яратиш борасида ҳеч қандай силжиш йўқ. Ҳалигача 40-50 йил илгари яратилган узум навлари экилмоқда. Ваҳоланки, жаҳон бозорига йилига маҳсулотнинг 400дан ортиқ нави тақдим қилиняпти. Ўтган йили биргина Олтиариқ туманида ғалла майдонлари қисқартирилиб, 2 минг гектар ерда йирик узумзорлар барпо этилиши натижасида 5 минг иш ўрни яратилди. Демак, соҳа мамлакатнинг экспорт салоҳиятини оширибгина қолмай, аҳоли бандлигини таъминлашда ҳам муҳим аҳамиятга эга.

 

Шу каби омиллар асосида Президент Шавкат Мирзиёев йиғилиш иштирокчилалрига Қорақалпоғистон ва вилоятлардаги 44 та туманда янги экспортбоп узум плантациялари ташкил этиш вазифасини қўйди.

 

“Мана шу 44та туманнинг ҳокимлари бу соҳани ҳам ўзининг ўсиш нуқтаси, драйвери қилиб одамларни боқиш бўйича ҳамма нарса қилса бўлади. Агар илмий ёндошув қилиб, инновацион, инвестицион жозибадорлигини ошириб, бугунги берилган имкониятлардан фойдаланиб иш қилса, фақатгина шу соҳани ўзида уч йилда 1,5 млрд долларлик маҳсулот экспорт қилиниши мумкин. Ўзбекистонда жуда катта имконият бор. Узумчилик бу – халқимизнинг асрлар давомидаги миллий деҳқончилик маданияти, қадрияти, ғурури ва даромад манбаи ҳисобланади. Узум халқимизнинг турмуш тарзи ва урф-одатлари билан бевосита боғланиб кетган”, -дея таъкидлади Президент Шавкат Мирзиёев.

 

Давлатимиз раҳбарининг қайд этишича, янги плантацияларга хизмат кўрсатиш инфратузилмаси йўлга қўйилади. Шу мақсадда қишлоқ хўжалиги вазирлигининг ҳудудий бўлинмаларида узумчиликни ривожлантириш, кўчат билан таъминлаш, касалликлардан ҳимоя қилиш бўйича лойиҳа офислари ташкил этилади.

 

Академик Маҳмуд Мирзаев номидаги боғдорчилик, узумчилик ва виночилик илмий-тадқиқот институти ҳамда бошқа илмий муассасаларнинг ерларида сертификатланган узум кўчатлари етиштириш йўлга қўйилади. Токзорлар барпо этиш ва эскиларини янгилашни рағбатлантириш мақсадида сертификатланган янги узум плантацияларининг ҳар бир гектарига 10 миллион сўмдан субсидия берилади.

 

Узумзорлар ташкил этишни молиялаштириш учун банкларга 100 миллион доллар ресурс ажратилади.