Қозоғистон мусулмонлари диний бошқармаси (ҚММИ) сунъий интеллектдан фойдаланган ҳолда яратилган сохта видеолар ва ёлғон ахборотларни тарқатишни тақиқловчи фатво чиқарди. Бу ҳақда NUR.KZ нашри хабар берди.
Диний идора изоҳига кўра, Ислом илм-фан ва технологиялар ривожини инкор этмайди. Бироқ ҳар қандай технологик тараққиёт инсонпарварлик, адолат ва ахлоқий қадриятларга асосланиши ҳамда шариат меъёрлари доирасида амалга оширилиши лозим.
ҚММИ таъкидлашича, технологиялардан яхши ва фойдали мақсадларда фойдаланиш жоиз ҳисобланади, аммо уларни зарар етказиш, ёлғон тарқатиш ёки одамларни чалғитиш учун ишлатиш қатъиян ман этилади.
Фатвода хусусан deepfake технологияларига алоҳида эътибор қаратилган. Унда кимнидир айтмаган гапини айтгандек ёки қилмаган ишини қилгандек кўрсатиш, ёлғон ахборот тарқатиш шариат нуқтайи назаридан қатъиян тақиқланиши қайд этилган. Бундай ҳаракатлар жамиятда ишончсизлик, низо ва беқарорликка олиб келиши, мамлакат тинчлиги ва бирлигига путур етказиши мумкинлиги таъкидланган.
Қайд этилишича, deepfake контентлар одамларни қўрқитиши, уларнинг обрўси ва ҳаёт хавфсизлигига таҳдид солиши мумкин.
Мазкур фатво билан Қозоғистон мусулмонлари диний бошқармаси мусулмонларни сунъий интеллект асосида яратилган сохта контентлар орқали одамларни алдаш ва ёлғон ахборот тарқатишдан тийилишга чақирди.