Қозоғистондаги ЙТҲда ҳалок бўлганларнинг икки нафари ёш бола экани маълум бўлди
Вафот этганларнинг барчаси Хоразм вилоятидан эканлиги қайд этилган.
Қозоғистоннинг Манғистау вилоятидаги трассада содир бўлган ЙТҲ оқибатида олти нафар Ўзбекистон фуқароси ҳалок бўлганди. Ташқи ишлар вазирлиги матбуот хизматининг маълум қилишича, қурбонлар орасида икки нафар бола ҳам бор.
Воқеа 16-октабр куни содир бўлганди. Jaс русумли автомобиль чегарадан ўтиш учун навбатда турган йўл четидаги МАN юк машинаси орқасига бориб урилган. Автомобилда жами 10 киши бўлган. 6 киши ҳалок бўлган, қолган тўрт нафар йўловчи Бейнеу туман марказий касалхонасига ётқизилган. Жабрланганларнинг аҳволи ўртача оғир деб баҳоланган.
Маълумотларига кўра, ҳалок бўлган барча фуқароларнинг шахсига аниқлик киритилган. Улар Россиядан Ўзбекистонга қайтаётган бўлган.
“Ақтаудаги бош консуллик ходимларимиз уларнинг қариндошлари билан боғланишди. Бугун улар Қозоғистонга келишади. Яқин кунларда жасадлар Ўзбекистонга олиб келинади. Шифохонада ётган тўрт нафар фуқаромизнинг аҳволи яхши, деб баҳоланмоқда. Улар шифохонадан чиққанларидан кейин Ўзбекистонга қайтади”, - дейилади вазирлик хабарида.
Қайд этилишича, ҳалок бўлганларнинг барчаси Хоразм вилоятидан бўлган — уч эркак, бир аёл ва икки нафар бола. Бир нафар эркак, аёл ва икки бола касалхонада.
