АҚШ Украинага ҳаво ҳужумига қарши замонавий тизимларни етказиб беради. Бу ҳақда Жозеф Байден Владимир Зеленский билан телефон мулоқоти давомида маълум қилди.
Ушбу мулоқот Россиянинг Украина бўйлаб йирик ракета зарбалари бериши ортидан ташкил этилди. АҚШ етакчиси ракета ҳужумларини қоралаган ва уларни маъносиз деб атаган.
"Президент Байден Украинага ўз мудофааси учун зарур ёрдамни, жумладан ҳаво ҳужумига қарши замонавий тизимларни беришга ваъда берди", — дейилади Оқ уй тарқатган баёнотда.
Пентагон 16 сентябрда берган маълумотида Украинага яқин икки ой ичида икки дона NASAMS зенит-ракета тизимларини етказиб берилишини айтганди.
Маълумот ўрнида: Кеча Россия Украинанинг қатор шаҳарларига ракета зарбалари берди. Натижада мамлакатнинг катта қисмида электр етишмовчилиги юзага келди. Ҳужумлар оқибатида 11 та муҳим инфратузилма объекти ишдан чиққан. Москва буни Қрим кўпригидаги портлашга жавобан амалга оширганини таъкидлаган.