Рамазон ҳайити ва қўшимча дам олиш кунларида тиббиёт муассасалари туну кун ишлайди. Бу ҳақда ССВ матбуот хизмати хабар берди.
Қайд этилишича, байрам ва қўшимча ишланмайдиган кунларда мамлакатдаги тиббиёт муассасалари фаолиятини мувофиқлаштириб бориш мақсадида Соғлиқни сақлаш вазирлигида штаб ташкил этилган.
Байрам ва қўшимча дам олиш кунларида қуйидаги даволаш-профилактика муассасаларида 40 минг нафар тиббиёт тизими ходими қонунда белгиланган тартибда, навбатчилик асосида аҳолига хизмат кўрсатади:
— 1010 та оилавий поликлиника,
— 858 та оилавий шифокор пункти,
— туман, вилоят ва республика миқёсидаги барча шифохоналар,
— ихтисослаштирилган тиббиёт марказлари,
— тиббиёт олий ўқув юртлари клиникалари.
Шунингдек, Республика шошилинч тиббий ёрдам илмий маркази, унинг ҳудудлардаги 13 та филиали ҳамда 180 та аҳоли пунктида жойлашган субфилиалларида 24 соат давомида навбатчи шифокор ва ҳамширалар фаолият юритади. Ушбу муассасалар зарур дори-дармонлар билан таъминланиб, захира ўринлари яртилган.
Мамлакат бўйлаб 2700 га яқин тез тиббий ёрдам бригадаси аҳолидан бўладиган чақириқлар учун доимо шай ҳолатда.
Бундан ташқари, 218 та туғуруқ, 238 та болалар даволаш муассасалари ҳам узлуксиз иш олиб боради.