Россия 2024 йилда ҳарбий харажатларни 2 баравар оширади
Бу мамлакат ялпи ички маҳсулотининг 6 фоизига тенг.
Россия келаси йили ҳарбий харажатларни сезиларли даражада оширишни режалаштирмоқда. Харажатлар 2024 йилда мамлакат ялпи ички маҳсулотининг 6 фоизини ташкил қилади. Бу кўрсаткич 2023 йилда 3,9 фоиз ва 2021 йилда 2,7 фоиз эди.
Ҳукуматнинг устуворликлари ҳарбий операциялар фонида ўзгариб бормоқда, бу эса охири кўринмайдиган оғир молиявий харажатларни талаб қилади. Иқтисодиёт мисли кўрилмаган халқаро санкциялар босими остида қолган ва Кремль март ойида бўлиб ўтадиган президентлик сайловларига тайёргарлик кўраётган бир пайтда ҳарбий харажатлар келгуси йилда ижтимоий харажатлардан ошиб кетиши мумкин.
Ҳукумат муҳокама қиладиган таклифлар лойиҳасига кўра, ҳарбий харажатлар жорий йилда 6,4 триллион рублдан 2024 йилда 10,8 триллион рублга (112 миллиард доллар) кўтарилади.
2024 йилда ижтимоий сиёсатга сарфланадиган харажатлар 7,5 триллион рублга етиши режалаштирилган. Бюджет лойиҳасида 2024 йилда жами харажатлар 36,6 триллион рубль миқдорида прогноз қилинмоқда, бу жорий йилга нисбатан 15 фоизга кўпдир.
Ҳарбий харажатларнинг кескин ўсиши ва санкциялар таъсирига қарамай, ҳукумат 35 триллион рублдан ортиқ даромадга умид қилмоқда, бу 2023 йилга нисбатан 22 фоизга ортиқ.
