АҚШ администрациясининг норасмий баҳосига кўра, Россия Украинада 75 минг аскар йўқотган бўлиши мумкин. Бу ҳақда The New York Times хабар берди.
Президент маъмурияти Конгрессга шундай маълумот тақдим этган. Номи сир қолишини истаган конгрессменнинг сўзларига кўра, Давлат департаменти, мудофаа вазирлиги, Штаб бошлиқлари қўмитаси ва разведка бу бўйича қўшма маълумотнома тайёрлаган.
"Жанговар ҳаракатлар бошланганидан буён Россия ва Украина бир-биридан йўқотишлар ҳақидаги маълумотларни яшириб, бутун дунёни шубҳали тахминлар қилишга мажбурлаб келади. Ҳар икки томон ҳам бу рақамларнинг пасайтириб кўрсатилишидан манфаатдор: Россияга бу ички аудиторияга муваффақиятлар ҳақида гапириш учун керак, Украина учун эса бу жанговар руҳни сақлаб қолиш имконини беради", — дейилади хабарда.
Аввалроқ АҚШ давлат департаменти Россиянинг Киев билан музокаралар ўтказишга тайёр эмаслигини маълум қилганди.