Россияда мигрантлар учун патент нархи оширилмоқда

Москвада 2025 йилда муҳожирлар учун патентлар нархи 8,9 минг рублни ташкил этади, бу амалдаги қийматдан деярли 1,5 минг рублга қиммат.

 

“Муҳим масала — мигрантлар солиқлар нуқтаи назаридан фуқароларимиз билан таққосланадиган миқдорда пул тўлаши лозим. Биз фуқароларимизнинг ойлик даромад солиғи тўловларини ҳисобга оламиз ва буни ушбу тоифа ишчилар билан солиштирамиз. 

 

Ҳозирда бизда патент учун ойлик тўлов 7,5 минг рубль, аслида, бу даромад солиғи бўйича аванс ҳисобланади. 1 январдан бошлаб бу миқдор 8,9 минг рублни ташкил этади”, деди пойтахт мэри Сергей Собянин.

 

Унинг сўзларига кўра, бу иш берувчиларнинг мигрантлар ва Россия фуқароларига сарфлайдиган харажатларини тенглаштиради.

 

“Бу механизм анча олдин яратилган бўлиб, у айнан мигрантлар иш берувчиларга фуқароларимизга қараганда арзонроқ тушмаслигини тартибга солади”, деб тушунтирди Москва мэри. 

 

Собянин Москвада берилган меҳнат патентлари сонида сезиларли ўсиш кузатилмагани, у ҳозирда 450 мингга яқинни ташкил этишини айтди.