Россияга қарши санкциялар қандай шартлар асосида бекор қилинади?
АҚШ давлат котиби ўринбосари жавоб берди.
Ғарбнинг Россияга қарши жорий этилган санкциялари бекор қилиниши шарти айтилди. Бу ҳақда АҚШ давлат котиби ўринбосари Виктория Нуланд маълум қилди.
"Агар Россия Украинадаги урушни бекор қилса, санкциялар тугайди", — деган у "ТАСС" нашрига берган интервьюсида. Нуланд, шунингдек, Москва Украина қайта тикланишида иштирок этиши, унинг суверенитети ва ҳудудий яхлитлигини тан олиши лозимлигини таъкидлаган. Дипломатнинг фикрича, Россия ҳозирда "Украинанинг мавжуд бўлиш ҳуқуқи" фактини инкор этиб келмоқда.
Маълумот ўрнида: 24 февраль куни Россия Украина шарқида махсус операция бошлаганини эълон қилди. Шу кунгача Бердянск, Херсон каби йирик шаҳарлар эгалланди. Одесса ва Мариуполь ҳозирда қуршаб олинган. Киев ва Харьков остоналарида қонли жанглар давом этмоқда. Уруш ортидан Москвага қарши Ғарб янги санкциялар жорий этди. Евроиттифоқ ва АҚШ Россия самолётлари учун осмонини ёпди.
Эслатиб ўтамиз, аввалроқ Путин рус ва украинларни бир халқ деб ҳисоблашини айтганди.
