Самарқандда 100 миллион долларлик фотоэлектор станцияси яқин ойларда қуриб битказилади
Самарқанд вилоятининг Нуробод туманида қуввати 100 МВт бўлган қуёш фотоэлектр станциясини қуриш ишлари давом этмоқда. Станция жорий йилнинг тўрттинчи чорагида ишга туширилиши режалаштирилган.
Франциянинг “Total Eren S.A.” компанияси билан ҳамкорликда Самарқанд вилоятининг Нуробод туманида қуввати 100 МВт бўлган қуёш фотоэлектр станциясини қуриш ишлари жадал олиб борилмоқда.
Ҳозирда кириш йўлларини қуриш, ер майдонини текислаш ва тўсиқлар билан ўраб чиқиш ишлари якунланган. Шунингдек, республикага лойиҳа доирасида ишлатиладиган ускуналар олиб келинмоқда. Ҳозирга қадар 50 та контейнер олиб келинган ва 200 дан ортиқ ишчилар жалб қилинган.
Лойиҳа 2021 йилнинг декабрь ойида тўлиқ ишга туширилиши режалаштирилган.
Мазкур станциянинг ишга туширилиши натижасида йилига 260 миллион киловатт соат электр энергияси ишлаб чиқарилиб, 76 миллион метр куб табиий газ тежалади.
Мазкур инвестиция лойиҳаси доирасида барпо этилаётган электр станциясининг умумий ер майдони 353 гектарни, лойиҳанинг умумий қиймати эса 100 миллион АҚШ долларини ташкил этади.
