Саудия Арабистони сайёҳлар учун очилмоқда
1 августдан эътиборан Саудия Арабистонига сайёҳларнинг киришига рухсат берилади.
Бу ҳақда мамлакат Туризм вазирлиги Твиттердаги саҳифасида маълум қилган.
«2021 йилнинг 1 августидан коронавирусга қарши эмланган туристик виза эгалари учун подшоҳлик ҳудудига кириш тақиқи бекор қилинади. Улар эмланганлик ҳақида маълумотома тақдим қилишса, мажбурий карантинда бўлишмайди», – дейилади вазирлик баёнотида.
Саудия Арабистонида коронавирусга қарши қуйидаги тўртта вакцина маъқулланган: Moderna, Johnson & Johnson, AstraZeneca ва Pfizer/BioNTech.
Сўнгги маълумотларга кўра, Саудия Арабистонида коронавирусга чалинганлар сони 523 мингдан ошди, беморлардан 8,2 мингдан зиёди вафот этди. Коронавирусга қарши эмлаш ишлари ўтган йилнинг декабрида бошланган бўлиб, аҳолининг ярми ақалли бир марта эмланди.
