Шавкат Мирзиёев Тожикистон раҳбари билан телефон орқали мулоқот қилди
Давлат етакчилари амалий ҳамкорликни янада кенгайтириш масалаларини муҳокама қилишган.
Бугун, 4 май куни Шавкат Мирзиёев Тожикистон Республикаси Президенти Эмомали Раҳмон билан телефон орқали мулоқот қилди. Бу ҳақда Президент матбуот хизмати хабар берди.
Қайд этишича, давлат етакчилари муқаддас Рамазон ҳайити билан бир-бирини самимий қутлаб, икки мамлакатнинг биродар халқларига тинчлик-осойишталик, бахт-саодат, фаровонлик ва равнақ тилаган.
Ўзбекистон ва Тожикистон ўртасидаги дўстлик, яхши қўшничилик ва стратегик шериклик муносабатларини янада мустаҳкамлашнинг долзарб масалалари кўриб чиқилган. Олий даражадаги музокаралар якунида қабул қилинган битимлар ва эришилган келишувларнинг амалга оширилиши батафсил муҳокама қилинган.
Амалий ҳамкорликни кенгайтириш, шу жумладан, ўзаро савдо ҳажмини ошириш, саноат, энергетика, қишлоқ хўжалиги, транспорт соҳалари ва бошқа йўналишларда устувор кооперация лойиҳаларини илгари суришга алоҳида эътибор қаратилган.
Давлат раҳбарлари ҳудудлар ўртасидаги мулоқотларни фаоллаштириш ва маданий-гуманитар алмашинувни ривожлантириш зарурлигини таъкидлаган.
Ўзаро лойиҳалар ва кўп қиррали ҳамкорлик дастурларини амалга оширишни жадаллаштириш учун икки мамлакат ҳукуматлари даражасида мунтазам учрашувлар ўтказиш ва мувофиқлашувни кучайтириш муҳим экани қайд этилган.
Бундан ташқари, минтақавий кун тартибининг долзарб жиҳатлари юзасидан фикр алмашилган, бўлажак икки ва кўп томонлама тадбирлар режаси кўриб чиқилган.
Ўзбекистон ва Тожикистон Президентларининг телефон орқали мулоқоти ҳар доимгидек ишонч ва дўстлик руҳида ўтган.
