Шимолий Кореяга қарши санкцияларни юмшатиш таклиф қилинди
Ушбу таклиф БМТнинг юқори мартабали амалдори томонидан берилган.
БМТнинг Инсон ҳуқуқлари бўйича Олий комиссари Мишель Бачелет КХДРга қарши санкцияларни юмшатишга чақирди. Бу ҳақда у Женевадаги Инсон ҳуқуқлари кенгаши 50 сессиясида маълум қилган.
“Мен ҳамон COVID-19 тарқалишининг КХДРдаги инсон ҳуқуқларига таъсиридан хавотирдаман. Бирон-бир вакцинация жараёнисиз, чекланган соғлиқни сақлаш инфратузилмаси ҳамда озиқ-овқат билан беқарор вазият фонида бу аҳолининг ўта қашшоқ қатламларига жиддий дахл қилиши мумкин”, — деган Олий комиссар.
Шунинг учун Бачелет халқаро ҳамжамиятдан Пхеньянга қарши санкцияларни юмшатишни сўраган. Унинг фикрича, бу зудлик билан гуманитар ёрдам бериш имкониятини тақдим этади.
Маълумот ўрнида: 12 май куни Шимолий Кореяда пандемия бошланганидан буён илк бор коронавирус ҳолатлари қайд этилгани расман тан олинди. Шундан кейин касаллик мамлакатда шиддат билан тарқалди. Хусусан, ҳозирда 4.39 миллион киши COVID-19 билан касалланган.
