Тамаки саноати глобал исишга сабаб бўлмоқда
Статистикага кўра, у ҳар йили 600 миллион дарахтни йўқ қилади.
Жаҳон соғлиқни сақлаш ташкилотининг янги ҳисоботида айтилишича, тамаки саноати кўпчилик билганидан кўра каттароқ таҳдид ҳисобланади. Чунки у дунёнинг энг катта ифлослантирувчиларидан бири бўлиб, глобал исишга ҳам ҳисса қўшади.
Бутунжаҳон тамакидан воз кечиш куни муносабати билан эълон қилинган “Тамаки: сайёрамизни заҳарлаш” ҳисоботида тамаки саноати атроф-муҳитга ва инсон саломатлигига қанчалик зарар етказаётгани ҳақидаги янги маълумотлар баён этилган.
Тамаки саноати ҳар йили 8 млн инсон ҳаётини, 600 млн дарахтни, 200 минг гектар ерни ва 22 млрд тонна сувни йўқ қилади. Бундан ташқари, тамаки маҳсулотлари сайёрамиздаги хавфли маҳсулот бўлиб, 7000 дан ортиқ заҳарли кимёвий моддаларни ўз ичига олади.
