“Тахтақорача” довонида Isuzu пастликка қулади
Шундан сўнг юк машинаси ёниб кетган.
Бугун, 14 апрель куни Қашқадарё вилоятининг Китоб тумани “Тахтақорача” довонида юк машинаси пасликка тушиб кетди. Бу ҳақда “ЎзА” ахборот агентлиги хабар берди.
Қайд этилишича, ҳолат соат 09:45 ларда Китоб туманидан ўтувчи “Тахтақорача” довони автомобиль йўлининг 1139-киломертида юз берган. Самарқанд – Қашқадарё йўналиши бўйича ҳаракатланиб кетаётган Isuzu русумли юк автомобиль ҳайдовчиси ўзининг эҳтиётсизлиги оқибатида бошқарувни йўқотиб пастликка тушиб кетган, натижада ёнғин чиққан ва транспорт воситаси ёниб кетган.
Вазият бўйича Қашқадарё вилояти фавқулодда вазиятлар бошқармаси қутқарувчилар гуруҳи манзилга етиб бориб, содир бўлган ёнғин оқибатларини бартараф этди.
Юк машинасида бўлган 24 ёшли фуқаро О.А. ҳамда унга ҳамроҳлик қилаётган фуқаро А.О. машинадан сакраган. Сакраши оқибатида улар тан жароҳати олган ва туман тиббиёт бирлашмасига юборилган. Ҳозирда уларнинг аҳволи яхши.
