Тўқаев «AMANAT» партияси раиси ваколатини ўзидан соқит қилди
Қозоғистон Президенти Қосим-Жўмарт Тўқаев бугундан эътиборан «AMANAT» партиясининг раиси ваколатини ўзидан соқит қилди.
«Давлат раҳбари ҳеч бир партияга устувор аҳамият бермаслиги, яъни сиёсий жиҳатдан бетараф бўлиши керак. Бу менинг аниқ позициям», — деди Президент «AMANAT» партияси қурултойида.
Тўқаев, шунингдек, партия раислигига ҚР Парламенти Мажилиси раиси Ерлан Қошанов номзодини таклиф қилди.
Эслатиб ўтамиз, бугун Президент иштирокида «AMANAT» партиясининг XXIII қурултойи бўлиб ўтмоқда. Унда барча вилоятлардан делегатлар иштирок этмоқда. Конгресс онлайн тарзда ўтказилмоқда. Қурултойда «ADAL» сиёсий партиясини «AMANAT» партиясига бирлаштириш масаласи кўриб чиқилиши режалаштирилган.
