Қозоғистон ядро хавфсизлиги принципини қатъий ҳимоя қилади. Бу ҳақда президент Қосим-Жўмарт Тўқаев маълум қилди.
“Бугун халқаро ядро синовларига қарши кураш куни. У инсоният учун катта аҳамиятга эга. Атом портлашлари қозоқ заминига улкан зарар етказган. Бу фожиа қайтарилмаслиги керак. Мамлакатимиз ядро хавфсизлиги тамойилларида қатъий қолади”, – деб ёзган у ўз Twitter саҳифасида.
29 август куни халқаро ядро синовларига қарши кураш куни нишонланади. Бу 2009 йил 2 декабрда Қозоғистон ташаббуси билан БМТ Бош ассамблеяси томонидан таъсис этилган. Бу сана 1991 йил 29 август куни Семипалатинск ядро полигони ёпилиши билан боғлиқ. Ушбу полигон дунёдаги энг йирик объектлардан бири эди.
Аввалроқ Антониу Гуттериш ядро таҳдиди энг юқори босқичга чиққанини айтганди.