Тошкентда иккита автобус тўқнашиб кетди
Ҳодиса оқибатида тан жароҳати олганлар бор.
Тошкент шаҳрининг Сергели туманида иккита йўловчи автобус иштирокида йўл-транспорт ҳодисаси юз берди. Ҳолатга “Тошшаҳартрансхизмат” АЖ муносабат билдирди.
Ҳодиса бугун, 14 июнь куни соат 16:14 ларда Сергели тумани Янги Сергели кўчасида юз берган. “King Long” русумли автобус ҳайдовчиси пиёдалар ўтиш йўлагида тўхтаган вақтида орқадан оралиқ масофа сақламай келаётган яна бир “King Long” русумли автобус келиб урилган.
Дастлабки маълумотга кўра, ушбу йўл-транспорт ҳодисаси натижасида автобус ҳайдовчиси, чиптачиси ва 2 нафар йўловчилари тан жароҳати олган, автобуслар техник шикастланган.
Содир этилган йўл-транспорт ҳодисаси юзасидан “Тошшаҳартрансхизмат” АЖ Ҳаракат хавфсизлигини назорат қилиш бўлими томонидан хизмат текшируви ўтказилиши белгиланди.
