Тошкентда «Lacetti» ҳайдовчиси ЙПХ ходимига бўйсунмасдан қочиб кетди
Такроран бўйсунмасдан қарама-қарши ҳаракатланган.
Бугун ижтимоий тармоқларда «Lacetti» ҳайдовчиси ЙПХ ходимига бўйсинмай ҳаракат қилиб қочиб кетгани акс этган видеолавҳа тарқалди.
Мазкур ҳолат юзасидан Zamon.uz муҳбири Тошкент шаҳар ИИББ ЙҲХ бошқармаси матбуот хизмати бошлиғи Қаҳрамон Худойберганов билан боғланди.
Маълум бўлишича, воқеа 28 июнь куни соат таҳминан 17:25 ларда содир бўлган. Мирзо Улуғбек тумани, Мустақиллик кўчасида Тошкент шаҳар ЙҲХБ ЙПХБ махсус двизион 2-сафарбар гуруҳи ЙПХ инспектори кичик сержант Туклибаев Шерали хизмат олиб бораётган вақтда, Мирзо Улуғбек тумани, Моварауннахр кўчасида йўл ҳаракати қоидаларини бузиб ҳаракатланган “Ласетти” русумли давлат рақами 01 В 508 QA бўлган транспорт воситасини бошқариб бўйсунмасдан ҳаракатланган ҳайдовчи 1992 йилда туғилган О. Байалиевни тўхтатилганида ҳайдовчи такроран бўйсунмасдан қарама-қарши ҳаракатланган.
Қайд этилишича, кўрилган чора-тадбирлар натижасида ҳайдовчи тўхтатилиб, Ўзбекистон Республикаси МЖтКнинг 126, 128-моддаси 3-қисми, 135 ҳамда 194-моддада назарда тутилган ҳуқуқбузарликларни содир қилганлиги учун UZ-20 серияли 01-344091 рақамли маъмурий баённома расмийлаштирилиб, МЖтКнинг 291-моддаси (а) бандига кўра автомашина вақтинчалик жарима майдонига жойлаштирилган.
Муножат Валиева
