Тўхтовсиз уруш Сурия саноатига қанча зарар келтиргани маълум қилинди
Шунингдек, кўплаб корхоналар атайин вайрон қилингани айтилди.
Сурия саноати мамлакатда тўхтовсиз давом этаётган уруш оқибатида 23.5 миллиард доллар зарар кўргани маълум бўлди. Бу ҳақда Сурия саноат вазири Зиёд Саббоғ “РИА Новости”га берган интервьюсида айтиб ўтган.
“Хусусий ва давлат секторидаги саноатга етказилган зарар 2019 йил охирида 23.55 миллиард долларни ташкил этди”, – деган вазир.
Унинг сўзларига кўра, энг катта зарар нефть саноатига етказилган. Шунингдек, стратегик аҳамиятга эга бўлган озиқ-овқат ва дори-дармон ишлаб чиқарувчи объектлар атайин вайрон қилинганлиги таъкидланди.
Саббоғ Халаб вилоятидаги текстиль корхоналари ҳам жиддий зарар кўрганини маълум қилган. У ерда террорчилар давлат ва хусусий секторга қарашли фабрикаларни талон-тарож этган.
Маълумот ўрнида: Сурияда 2011 йилдан бери уруш давом этмоқда.
Аввалроқ Туркия Сурия шимолидаги курдларга қарши ҳужум бошлаши мумкинлиги ҳақида хабар қилинганди.
Жаҳонгир Қўзиев
