Трасс: Мен исёнчиман

 

Буюк Британия бош вазирлиги учун курашаётган Элизабет Трасс ҳукумат фаолиятини ўзгартиришини маълум қилди. Бу ҳақда уDaily Telegraph газетасига берган интервьюсида айтган.

 

“Мен ўзимни исёнчи сифатида кўраман: чунки барчасини ўзгартиришни истайман”, – деган амалдаги ташқи ишлар вазири.

 

Хусусан, у уч омил туфайли янгиликлар жорий этиш лозимлигини таъкидлаган. Биринчидан, Британия иқтисодиётида ўн йилдан буён кучли ўсиш кузатилмаяпти. Иккинчидан, “постпандемия давридаги кучли иқтисодий шок” ҳолати мавжуд. Учинчидан, Украина низоси ўзгартиришларни амалга оширишга ундамоқда.

 

“Бу мамлакат тарихидаги энг муҳим давр. Биз одатдагидай яшаймизми? Ёки жасорат кўрсатиб бошқа ҳаракатларни амалга оширамизми? Бизнинг юқори ўсиш ва ишлаб чиқаришга эга давлатга айланишимиз учун барчасини бошқача қилмоқчиман” , – деб қайд этган номзод.

 

7 июль куни Борис Жонсон бирлашган қироллик бош вазири лавозимидан истеъфога чиқди. Шундан кейин мамлакатда ҳукумат раҳбари лавозими учун кураш бошланди. Якунда собиқ молия вазири Риши Сунак ва амалдаги ташқи ишлар вазири Лиз Трасс қолди. Якуний натижалар 5 сентябрда маълум бўлади.