Туркия Сурия шимолида қуруқлик қўшинлари билан ҳарбий амалиёт бошлаши мумкин
Кеча ушбу ҳудудга турк самолётлари авиазарба берганди.
Туркия Сурия шимолида қуруқлик қўшинлари иштирокида ҳарбий амалиёт бошлаши мумкин. Бу ҳақда Yeni Şafak газетаси хабар берди.
Якшанба куни Анқара Суриядаги курд бўлинмаларига қарши ҳаво зарбалари берди. У 13 ноябрда Истанбулда юз берган терактга жавобан ушбу ҳаракатларни амалга оширган.
“Амалиёт давомида террорчиларнинг 89 объекти йўқ қилинди. Курдистон ишчи партиянинг кўплаб аъзолари, жумладан, бир қатор юқори мартабали раҳбарлари ҳалок бўлди. Амалиёт Сурияда қуруқлик қўшинлари иштирокида операциянинг биринчи босқичи сифатида кўрилмоқда”, – деган газета манбаси.
Қайд этилишича, кеча Туркиядаги олти авиабазадан бир вақтнинг ўзида ҳавога кўтарилган самолётлар Сурия ва Ироқ шимолига зарба берган.
