Украина ғалласи тез орада Одессадаги портлардан экспорт қилиниши мумкин
Туркия Москва ва Киев билан бу масалада келишувга эришилганини маълум қилган.
Украина ғалласини олиб чиқиш учун Одесса портида учта хавфсизлик йўлаклари очилиши мумкин. бу ҳақда ТАСС нашри Анқарадаги манбаларига асосланиб хабар берди.
“Биринчи босқичда Одессанинг тўрт портидан учта хавфсизлик йўлакларини очиш имкониятлари кўриб чиқилмоқда”, – деган манба.
Бундан ташқари, тўрт томонлама (Россия, Украина, Туркия ва БМТ) механизмнинг ишга туширилиши ва етказиб беришнинг бошланиши билан Туркияда дондан ишлаб чиқариладиган маҳсулотлар нархи 20-25 фоизга арзонлаши кутилмоқда.
Шу билан бирга чоршанба куни Москвада Россия ва Туркия ҳарбий делегациялари иштирокида музокаралар бўлиб ўтган. Анқара бу мулоқотни ижобий баҳолаган. Туркия миллий мудофаа вазирлигининг маълум қилишича, икки давлатнинг Украина ғалласини экспорт қилиш масаласида маслаҳатлашувларини давом эттиришга келишиб олинган.
Туркия мудофаа вазири Хулуси Акар ўтган ҳафтада Туркия, РФ ва Украина ҳарбий идоралари ўртасида украин ғалласини олиб чиқиш масаласида шошилинч алоқа линияси ўрнатилганини айтганди.
Аввалроқ АҚШ Украинадан ғалла олиб чиқишнинг қўшимча йўлларини қидираётгани тўғрисида хабар берилганди.
