Венесуэла Олий суди мамлакат вице-президентини вақтинчалик президент этиб тайинлади
Николас Мадуро қўлга олиниши натижасида ўз конституциявий ваколатларини бажариш имкониятидан маҳрум бўлган.
Венесуэла Олий суди мамлакат президенти Николас Мадуронинг қўлга олиниши ортидан юзага келган фавқулодда вазият муносабати билан ижро ҳокимиятида вақтинчалик ўзгаришлар киритди.
Суднинг Конституциявий палатаси қарорига кўра, вице-президент Делси Родригес Венесуэла Республикаси президенти вазифасини вақтинча бажарувчи этиб тайинланди. Ушбу қарор давлат телеканали VTV орқали Конституциявий палата раиси Карислия Беатрис Родригес томонидан эълон қилинди.
Қарорда таъкидланишича, Николас Мадуронинг қўлга олиниши натижасида у ўз конституциявий ваколатларини бажариш имкониятидан маҳрум бўлган.
Шу сабабли вазият “фавқулодда ва вақтинчалик ҳуқуқий имкониятсизлик ҳолати” сифатида баҳоланган.
“Республика ижрочи вице-президентига Президент лавозимига оид барча ваколатлар, мажбуриятлар ва функцияларни амалдаги қонунчилик доирасида вақтинча амалга ошириш топширилди”, — дейилади расмий баёнотда.
Шунингдек, мазкур чора давлат бошқарувида узлуксизликни сақлаш, миллий хавфсизликни таъминлаш ва мамлакатнинг конституциявий барқарорлигини ҳимоя қилиш мақсадида қабул қилингани қайд этилган.
Эслатиб ўтамиз, 3-январга ўтар кечаси Каракас шаҳрида бир нечта портлашлар содир бўлган.
Ҳужумлар оқибатида қурбонлар ва жароҳатланганлар борлиги хабар қилинган.
Венесуэла бош прокурори Тарек Уильям Сааб АҚШни Каракасдаги ҳужумлар учун масъул деб ҳисоблашини билдириб, Николас Мадуро ва унинг рафиқасига етказилиши мумкин бўлган ҳар қандай зарар учун АҚШ ҳукумати жавобгар бўлишини таъкидлади.
