Ярим тундаги йиғилиш, дам олишни ишхонада ўтказаётган ходим ёхуд "қаттиқ" ишлаётган мансабдорлар
Сўнгги 6 ойда қанча мансабдор меҳнат қонунчилигини бузди?
АОКАда Бандлик ва меҳнат муносабатлари вазирлиги мутасаддилари иштирокида матбуот анжумани ўтказилди.
Таъкидланганидек, 2022 йилнинг биринчи ярмида Бандлик ва меҳнат муносабатлари вазирлигига меҳнат муносабатларига оид 11,6 мингдан ортиқ мурожаат келиб тушган. Шундан 6 551 таси қаноатлантирилган, 4 546 тасига эса тушунтириш берилган.
Олти ой давомида 14 066 та ташкилот ва корхонада ўрганишлар ўтказилиб, 41 150 та меҳнат қонунчилиги бузилиши ҳолати аниқланган. Натижада, 5 935 нафар мансабдор шахсга нисбатан 12 миллиард 57 миллиондан ортиқ маъмурий жарима қўлланилган.
Шунингдек, адлия органларига 1000 дан ортиқ даъво аризалари киритилиб, 5 миллиарддан ортиқ ойлик иш ҳақи ва бошқа тўловлар ундирилди.
