Евроиттифоқ Россияга қарши санкцияларининг 12-пакетини тайёрламоқда
ЕИ бу гал Россия иқтисодий оғир зарба олишига ишонади.
Еврокомиссия яқин орада Европа Иттифоқининг Россияга қарши санкцияларининг 12-пакетини тақдим этади.
Унда импорт ва экспортга янги тақиқлар ҳамда нефть нархининг юқори чегарасини кучайтириш чоралари жой олган.
"Тез орада биз санкцияларнинг 12-пакетини тақдим этамиз. Рўйхатга янги қўшимчалар киритилган. Импорт ва экспортга янги тақиқлар, нефть нархининг шифтини кучайтириш бўйича ҳаракатлар шулар жумласидандир", — деб ёзди Еврокомиссия раҳбари.
Аввалроқ Политисо газетаси Еврокомиссия келгуси ҳафтада Россия Федерациясига қарши санкцияларнинг 12-пакети бўйича ўз таклифларини тақдим этиши кутилаётгани, муҳокамалар йил охиригача давом этиши мумкинлигини хабар қилганди. Европа Иттифоқининг Россияга қарши янги санкциялари кимёвий моддалар, ҳарбий мақсадларда фойдаланиладиган технологиялар, қайта ишланган металлар, алюминий маҳсулотлари, қурилиш ва транспорт маҳсулотлари, пайвандлаш машиналари ва дастурий таъминот лицензияларини ўз ичига олиши мумкин. Бундан ташқари, Россия олмосларини олиб киришни тақиқлаш масаласи ҳам муҳокама қилинмоқда.
Санкцияларнинг 12-тўплами учинчи давлатлар орқали санкцияларни четлаб ўтишга уринишларга қарши чораларни ҳам ўз ичига олади. Иттифоқ аллақачон кўрилган чораларга учинчи мамлакатлардаги кўпроқ товарлар ва компанияларни қўшишга ҳаракат қилади.
Жорий йилнинг июнь ойида Иттиффоқнинг Россияга қарши 11-санкция пакети киритилганидан сўнг Европа Иттифоқининг шахсий чекловлари деярли 1,8 минг шахс ва ташкилотларга таъсир кўрсатди. Чекловчи чоралар Европа Иттифоқи мамлакатларидаги активларни музлатиш билан боғлиқ. Европа Иттифоқи фуқаролари ва компанияларига санкциялар рўйхатидагиларга маблағ бериш тақиқланади. Жисмоний шахсларга қўшимча равишда саёҳат тақиқланади, бу эса уларнинг Европа Иттифоқига киришига ёки минтақа орқали транзит ўтишига тўсқинлик қилади.
Россия Ғарб бир неча йил аввал бошлаган ва кучайишда давом этаётган санкция босимига дош беришини бир неча бор таъкидлаган.
Шунингдек, айрим экспертлар ҳам Россия иқтисодиёти санкциялар босими остида синиш ўрнига уларга чап бериб қолаётгани ҳақида гапирган.
