Европа давлатларидан бирининг мудофаа вазирлиги киберҳужумга учради
Оқибатда вазирлик почта тизими тўрт ҳафтага ишдан чиққан.
Бельгия мудофаа вазирлиги электрон почта тизими хакерлар ҳужуми туфайли тўрт ҳафта давомида ишламаган. Бу ҳақда вазирлик матбуот котиби Людивин Дедондер маълум қилди.
Маълумотларга кўра, мудофаа вазирлиги ходимлари 2021 йил 16 декабрда киберҳужум содир бўлганини қайд этишган. Уларга жўнатилган электрон хатларни кўриш мумкин бўлган, аммо ходимлар жавоб мактубларини жўната олмаган.
Дедондернинг маълум қилишича, фақатгина 11 январь куни почта тизими қайта тикланган. Унинг фаолиятидаги узилишларни амалдор бутун ёзишмалар тизимининг ўчириб қўйилгани билан боғлаган.
Аввалроқ АҚШ Эрон хакерларини президент сайловига аралашишда айблагани ҳақида хабар қилинганди.
Жаҳонгир Қўзиев
