Европада навбатдаги энергия инқирози кутилмоқда
Вазият совуқ об-ҳаво шароити туфайли янада оғирлашиши мумкин.
Европада совуқ ҳавонинг бошланиши муносабати билан иситиш учун газга талаб кескин ошди. Ўз навбатида, 2024 йилда газ нархи 45 фоизга кўтарилди. Вазият совуқ об-ҳаво шароити туфайли янада оғирлашиши мумкин. Шамол электр станциялари орқали ишлаб чиқариладиган электр энергияси зарурий эҳтиёжни тўлиқ таъминлай олмайди.
Bloomberg яқин келажакда газ нархининг янада ошишига олиб келиши мумкин бўлган асосий омиллардан бири сифатида Европа Иттифоқининг айрим давлатлари томонидан ҳамон сотиб олинаётган Россия газини етказиб беришнинг тўхтатилиши хавфини кўрсатмоқда. Бу газ тўловлари амалга ошириладиган “Газпромбанк”га қарши АҚШнинг янги санкциялари туфайли содир бўлиши мумкин. Бундан ташқари, йил охирида Россия газининг Украина орқали транзити бўйича келишув муддати тугайди.
Bloomberg бошқа хавф омиллари сифатида Қўшма Штатлардан суюлтирилган газ етказиб беришда юзага келиши мумкин бўлган кечикишлар ва қишнинг анча совуқ келишини қайд этади. Агентлик кутилмаларига кўра, ушбу жараёнлардан энг кўп жабрланадиган мамлакат Германия бўлиши мумкин.
