Ёлғон барибир ёлғонлигича қолаверади — Хитой ТИВ
Хитой ташқи ишлар вазирлиги АҚШ разведкасининг коронавирус тўғрисидаги ҳисоботига муносабат билдирди.
Хитой Ташқи ишлар вазирлиги АҚШ разведкасининг коронавирус келиб чиқиши бўйича ҳисоботига муносабат билдирди. Бу ҳақда ТИВ расмий вакили Ван Вэньбинь баёнот берган.
АҚШ разведкаси ўтган ҳафтада эълон қилган ҳисоботида Covid-19 лабораториядан тарқаб кетган бўлиши мумкинлиги тахмин қилинган. Аммо Веньбинь буни ғайриилмий ва ишончга сазовор бўлмаган маълумот деб атаган.
“Ёлғон минг маротаба қайтарилса-да, барибир ёлғонлигича қолаверади”, – деган Ван Вэньбинь бунга жавобан.
Шунингдек, у АҚШ махсус хизматларини ёлғончиликда айблаган. “Коронавируснинг кел чиқиши масаласи жиддий ва қийин масала ҳисобланиб, у бутун дунё олимлари билан ҳамкорликда ўрганилиши керак”, – дея қайд этган ТИВ вакили.
Шу билан бирга Вэньбинь АҚШдан Форт-Детрикдаги биологик лабораторияда текширув ўтказишга рухсат беришни талаб қилди.
Бундан аввал Хитойнинг Вашингтондаги элчихонаси ҳам АҚШ разведкаси ҳисоботини ғайриилмий деб баҳолаган эди
Жаҳонгир Қўзиев
