Ёшларнинг сайлов жараёнларида фаоллиги муҳим омил — япониялик кузатувчи
ЎзЭОАВМА томонидан ташкил этилган Халқаро медиа-холл тадбирлари доирасида хорижлик кузатувчилар билан ҳам учрашувлар бўлиб ўтмоқда.
Япония Ташқи савдо ташкилоти вакили Манабу Шимояширо сайлов жараёнларига оид фикрларини zamon.uz билан ўртоқлашди.
“Бу йилги Президент сайловида кузатувчи сифатида иштирок этяпман. Мамлакатингиз ёшлари сайловга бефарқ эмаслигини, улар сиёсий фаол эканини кўряпман. Бу таҳсинга сазовор. Япония сайловларида ҳам асосий масала — ёшларни сайловга жалб этишдир. Мени шахсан мамлакатдаги иқтисодий ўзгаришлар қизиқтиради. Бугун қишлоқ хўжалиги вазирлигида бўлдим. У ерда сўнгги йилларда юз берган ўзгаришлар, соҳа тараққиёти ҳақида маълумот берилди”, – деди Шимояширо.
Кузатувчи суҳбат давомида ҳудудларда сайловга кўрилган тайёргарликлар билан танишиш мақсадида вилоятлардаги сайлов участкаларини шахсан бориб кўриш истагида эканини билдирди.
Аввалроқ МСК да МДҲ кузатувчилар миссияси билан учрашув ташкил этилгани ҳамда Шифохоналарда коронавирусдан даволанаётган беморлар учун махсус мобил сайлов қутилари орқали овоз бериш имконияти яратилгани хабар қилинганди.
Жаҳонгир Қўзиев
