Зеленский АҚШ Конгрессида нималар деди?
Украина президенти кеча Америкага ташриф буюрганди.
Украина Америка аскарларининг Украина учун жанг қилишини сўрамаяпти. Бу ҳақда Владимир Зеленский АҚШ Конгрессидаги чиқишида маълум қилди.
Украина президенти унинг аскарлари Америка танклари ва самолётларини жуда яхши бошқаришга қодирлигини айтган.
"Америкалик аскарларнинг бизни ўрнимизга жанг қилишини сўрамаяпмиз. Мен украиналиклар сизнинг танк ва самолётларингизни ўта яхши бошқара олишига ишонтирмоқчиман", — деган у.
Бундан ташқари, жаноб Зеленский Россиядан тинчлик кутиш нотўғри экани ва украиналиклар учун энг катта янги йил совғаси ғалаба эканини таъкидлаган. Президентнинг фикрича, америкаликлар тақдим этаётган ҳарбий ёрдам пакети бу хайрия эмас, балки глобал хавфсизлик архитектурасига киритилаётган инвестициядир.
Шунингдек, Украина етакчиси глобал интеграция туфайли Вашингтон ҳарбий можарони инкор қила олмаслигини айтган.
Эслатиб ўтамиз, 21 декабрь куни Зеленский АҚШга ташриф буюрди. Конгрессдаги чиқишидан ташқари, у Жозеф Байден билан учрашган. Учрашув доирасида Америка 1,8 миллиард долларлик навбатдаги ҳарбий ёрдам пакетини эълон қилди.
