Украина Президенти Владимир Зеленский Россия томонидан 7 сентябрга ўтар кечаси амалга оширилган кенг кўламли ҳаво ҳужумини “қасддан содир этилган жиноят” деб атади. Давлат раҳбарининг таъкидлашича, бу каби ҳужумлар урушни янада чўзишдан бошқа натижа бермайди.
Зеленский Telegram’даги мурожаатида ҳужум оқибатида Киевда турар-жой бинолари вайрон бўлгани, юқори қаватларда ёнғин чиққанини, Украина Вазирлар Маҳкамаси биноси ҳам шикастланганини маълум қилди.
Расмий маълумотларга кўра, пойтахтда икки киши, жумладан бир бола ҳалок бўлган, 20 дан ортиқ фуқаро жароҳатланган.
Президентнинг сўзларига кўра, ҳужум чоғида 800 дан ортиқ дрон, 13 та ракета, жумладан баллистик ракеталар қўлланилган. Ҳаво ҳужумидан мудофаа кучлари улардан юзлабини йўқ қилган бўлса-да, кўплаб объектлар вайрон бўлди.
Зеленский шунингдек, Запорожье, Кривой Рог, Суми, Чернигов ва Одесса вилоятларида ҳам вайроналар ва қурбонлар борлигини таъкидлади. “Ҳар бир қўшимча ҳаво мудофаа тизими юзлаб инсонларнинг ҳаётини сақлаб қолади”, — деди у.
Давлат раҳбари халқаро ҳамжамиятни агрессияни тўхтатишга чақирди: “Дунё Кремль жиноятчиларини тўхтата олади, бунинг учун сиёсий ирода зарур”, — дея таъкидлади Зеленский.