“Mojaroni harbiy usul bilan hal etish hech kimga g‘alaba keltirmaydi” — Hamid Karzay
Afg‘oniston sobiq prezidenti mamlakatni muzokaralar orqali tinchlikka erishishga chaqirdi.
“AQSH Afg‘onistonda Rossiya, Xitoy, Eron va Pokiston bilan hamkorlik qilishi lozim. Muammoni harbiy yo‘l bilan hal etishga urinish besamar usul, tinchlikka faqatgina muzokaralar orqali erishish mumkin”,- dedi Hamid Karzay.
Sobiq prezident “Valday” xalqaro klubidagi diskussiyada ishtirok etar ekan “Mazkur mojaroning asosi hokmiyatning o‘zgarishi bo‘lib, AQSH bu jarayonda ishtirok etayotgan asosiy global o‘yinchilar bilan hamkorlik qilmasligining illoji yo‘q. Men Rossiya, Xitoy, Eron va Pokistonni nazarda tutyapman”,- deya qayd etgan.
Maʼlumot o‘rnida, bugun ijtimoiy tarmoqlarda “Tolibon O‘zbekiston va Tojikiston chegarasini kesib o‘tdimi?” degan mazmunda materiallar tarqaldi. O‘z navbatida RF Prezidentining Afg‘oniston bo‘yicha maxsus vakili Zamir Kabulov xalqaro “Valday” klubidagi muloqot chog‘ida “Tolibon qo‘shni davlatlar chegarasini buzib o‘tmadi va bunga harakat ham qilmaydi”,- deb aytib o‘tgan.
