Rossiyadagi mushtlashuvda o‘zbekistonlik mehnat migrantlarining ishtiroki o‘rganilib ularga huquqiy ko’mak beriladi
Ijtimoiy tarmoqlarda Rossiyaning Moskva shahrida turli millat vakillari ishtirokida etnik ommaviy mushtlashuv yuz bergani haqida xabarlar tarqalmoqda.
Avvalroq Moskva viloyatidagi Odinsovo va Mitishi shaharlarida ikkita ommaviy to‘qnashuv bo‘lib o‘tgani va norasmiy maʼlumotlarga ko‘ra unda o‘zbeklar ham ishtirok etgani haqida xabar qilgan edik.
Shu munosabat bilan Tashqi mehnat migratsiyasi agentligi Rossiyada bo‘lib turgan O‘zbekiston fuqarolariga murojat bilan chiqdi.
Unda aytilishicha, Tashqi mehnat migratsiyasi agentligi ushbu mushtlashuvda o‘zbekistonlik mehnat migrantlarining ishtirokini o‘rganib, zarur holatda yurtdoshlarimiz huquqlarini himoya qilish bo‘yicha o‘z vakolati doirasida barcha choralarni ko‘radi.
Shuningdek, agentlik ushbu davlatda bo‘lib turgan O‘zbekiston fuqarolaridan bunday ommaviy mushtlashuvlarda ishtirok etmaslikni, muammoli yoki nizoli vaziyatlarda vakolatli organlar hamda mamlakatimizning ushbu davlatdagi diplomatik idoralariga murojaat qilishni, Rossiya qonunlariga rioya etishni so‘raydi.
“Eslatib o‘tamiz, ommaviy mushtlashuvlarda ishtirok etish chet el fuqarolari uchun Rossiya qonunlariga muvofiq javobgarlikka tortilish yoki davlatdan majburiy chiqarib yuborishga olib kelishi mumkin”, - deyiladi xabarda.
