Москва вилоятида муҳожирлар ўртасида оммавий муштлашув содир этилди

Унда жами 60 нафарга яқин муҳожир қатнашган. Гувоҳларга кўра, иштирокчиларнинг қўлида пичоқ ва темир бўлаклари бўлган. Воқеа оқибатида ИИВ қўлга олинган муҳожирларни қайта мамлакатга кириш ҳуқуқидан маҳрум қилиб, депорт қилиш ҳаракатини бошлаган. 
Қайд этилишича, 6 августга ўтар кечаси "Одинбург" турар-жой мажмуасида оммавий муштлашув юз берган. Манбаларга кўра, тортишув  собиқ Иттифоқ республикалари, шунингдек, Россия Федерациясининг Жанубий ҳудудларидан келганлар ўртасида юз берган. 
Шу куни Москва вилоятининг Митиши шаҳрида ҳам шунга ўҳшаш воқеа содир бўлган. У ерда 40 га яқин муҳожир оммавий отишма-муштлашув иштирокчисига айланди. 
Қуролли отишма “Чегарачи” кўчасида юз берган. Унда, асосан,Марказий Осиё давлатлари фуқаролари иштирок этган. Дастлабки маълумотларга кўра жароҳатланганлар  бор. 
Норасмий хабарларда айтилишича, тортишув Россияга ишлаш учун борган ўзбек, чечен ва тожик миллатига мансуб кишилар ўртасида юз берган. 
Россия ички ишлар вазирлигининг Москва вилоятидаги матбуот хизмати ҳолат юзасидан Россия Федерацияси Жиноят кодексининг 213-моддаси (“безорлик”) билан жиноят иши очилганини билдирди.

РФ Ички ишлар вазирлиги таҳлиллари сўнгги вақтларда Россияда муҳожирлар орасида бу каби тортишув ва тартиббузарликлар сони ортганини кўрсатмоқда. Идора маълумотларига кўра, мамлакатда айни кунларда МДҲ давлатларидан келган 700 мингдан ортиқ муҳожир ноқонуний фаолият олиб бормоқда. 
Ҳозирга қадар қуролли тўқнашув бўйича Ўзбекистон Республикаси Ташқи меҳнат миграцияси агентлиги томонидан ҳеч қандай муносабат билдирилмади.