G‘azna ham “Tolibon” qo‘lida. Navbat Lashkargohgami?
“Tolibon” Afg‘onistonning yana bir yirik shahari — G‘aznani egalladi .Bu haqda harakat vakili Qori Yusuf Ahmadiy xabar berdi.
Shahardagi gubernator qarorgohi, politsiya boshqarmasi va qamoqxona jangarilar qo‘liga o‘tgan. Hukumat kuchlari garchi qarshilik ko‘rsatayotgan bo‘lsa-da, lekin G‘azna ustidan nazoratni qo‘ldan chiqargan. Nomi sir tutilishini istagan viloyat deputatlaridan biri ham bu maʼlumotni tasdiqladi.
Lashkargoh shahridagi politsiya boshqarmasi ham “Tolibon” qo‘liga o‘tgan. Hukumat kuchlarining 40 nafar harbiysi asir olingan, qolgan qismlar Lashkargohda joylashgan gubernator maʼmuriyati binosiga chekingan. “Tolibon” rasmiy vakili Zabihullo Mujohid bino to‘liq qamalga olinganini maʼlum qildi.
Afg‘onistondagi vaziyat og‘irlashgani sababli Rossiya Tojikistonga 1 million dollar ajratdi. Bu mablag‘ afg‘on-tojik chegarasini mustahkamlash uchun sarflanadi.
Bundan avval Afg‘oniston Tashqi ishlar vaziri Muhammad Xanif Atmar “Tolibon” butun dunyoni aldagani va unga bosimni kuchaytirish zarurligini maʼlum qilgan edi.
