“Tolibon” Afgʻonistondagi ikkinchi yirik shahar Qandahorni egalladi
Buni harakat vakillari ham, rasmiy Kobul ham tasdiqladi.
Maʼlumotlarga koʻra, Qandahor maʼmuriyati mahalliy aeroport orqali shahardan qochib ketgan. Bu shaharning egalllanishi “Tolibon” uchun katta ahamiyatga ega, sababi 1996—2001-yillarda Qandahor jangarilarning norasmiy poytaxti boʻlgan.
Bundan tashqari kecha Hirot shahri ham “Tolibon” qoʻliga oʻtdi. Ommaviy axborot vositalari maʼlumotlariga koʻra, jangarilar shaharda kuchli qarshilikka duch kelmagan. “Tolibon”ga aloqador akkauntlarning xabar berishicha, Hirot hokimi Ismoil Xon Eronga qochib ketgan, hukumat askarlari ommaviy ravishda asirga olingan.
Hilmand viloyati markazi Lashkargoh ham jangarilar tomonidan egallandi. Bu yerda qariyb bir oy davomida ogʻir janglar boʻlib oʻtdi. Jangarilar bugungi kunda 14 viloyatni oʻz nazoratiga oldi.
Vaziyat keskinlashganligi tufayli AQSH Kobuldagi elchixonasini evakuatsiya qilish masalasini koʻrib chiqmoqda. Soʻnggi maʼlumotlarga koʻra, Vashington evakuatsiya uchun qoʻshinlarni vaqtinchalik qaytarishi mumkin.
Bundan avval Gʻazna shahri “Tolibon” tomonidan egallangani maʼlum qilingan edi.
Jahongir Qo'ziyev
