Kapitoliy atrofiga bomba o‘rnatish bilan tahdid qilgan shaxs qo‘lga olindi

 

Bundan avval  Amerikada fuqarolardan biri Bayden bilan uchrashish uchun Kapitoliy atrofiga bomba o‘rnatganini xabar qilgan edik. 

 

Politsiya u bilan bir necha soatlik muzokara olib borganidan so‘ng mashinada bomba yo‘qligini aniqladi. Ammo mashinasidan portlovchi modda yasash uchun mo‘ljallangan materiallar olib qo‘yildi.

 

Erkakning shaxsi aniqlandi. Uning ismi Rey Rouzberri bo‘lib, 49 yoshda. So‘nggi paytlarda u Shimoliy Karolinada yashagan. U o‘zining Facebook sahifasida mashina kabinasidan tasvirlar joylagan. Hozir uning akkaunti bloklangan.

 

Kapitoliy politsiyasi Twitter‘da hodisa bo‘yicha kun davomida ikkinchi brifingni o‘tkazishini vaʼda bergan.

 

Kapitoliy politsiyasi rahbarining aytishicha, raqamsiz mashina kutubxona yaqinida  to‘xtagan. Haydovchi politsiyaga mashina ichida bomba va detonator borligi, uni hozir portlatishini aytgan.

 

Politsiya vaziyatni tinch yo‘l bilan hal qilish maqsadida haydovchi bilan muzokaraga kirishdi. Shu bilan birga, mashina atrofi o‘rab olinib, hududga snayperlar yuborildi.

 

AR xabariga ko‘ra, oradan qariyb 5 soat o‘tgach haydovchi mashinadan chiqqan.

 

 Sharofat Mahmudova