O‘rmon yong‘inlari oqibatida 2 million tonnadan ortiq organik modda yo‘q bo‘ladi
Bu haqda O‘rmon xo‘jaligi davlat qo‘mitasi boshqarma boshlig‘i o‘rinbosari G‘anisher Xo‘jayev AOKAda o‘tkazilgan brifingda maʼlum qildi.
Maʼlum bo‘lishicha, texnika rivojlanishi munosabati bilan tabiiy zahiralardan xo‘jalik maqsadlarida tobora ko‘proq foydalanilmoqda. Dunyoda aholi soni yildan-yilga o‘sib borayotgani ko‘proq miqdorda oziq-ovqat, yonilg‘i, kiyim-kechak va boshqa narsalarni ishlab chiqarishni talab qilmoqda.
Bu esa o‘rmonlar egallab turgan maydonlar qisqarishi, tabiatning buzilishi, atmosferaning azon to‘sig‘i kattarishi, yer havosining o‘rtacha harorati ortib borishi va boshqa holatlarga sabab bo‘lmoqda.
O‘rmon yong‘inlari, kasalliklar, noqonuniy daraxt kesish va boshqa o‘rmon to‘g‘risidagi qonun hujjatlarining buzilishlaridan muhofaza qilib boriladi. Yuridik va jismoniy shaxslar tomonidan daraxtlarni kesish va yog‘och sotish qoidalari bajarilishi, shuningdek, pichan o‘rish, mol boqish va o‘rmondan foydalanishning boshqa turlari qoidalariga rioya etilishi nazorat qilinadi. O‘rmon zararkunandalari va kasalliklari o‘chog‘i o‘z vaqtida aniqlanib, ularga qarshi biologik, mexanik kurash olib boriladi.
Statistik maʼlumotlarga ko‘ra, 99 foiz holatlarda bevosita insoniyat tufayli, qolgan 1 foiz holatda tabiiy ofatlar sababli o‘rmonlarda yong‘in kelib chiqadi.
Eslatib o‘tamiz, avvalroq Qoraqalpog‘istonda stansiyada turgan vagon yonib ketgani, NASA yer sayyorasidagi yong‘inlar xaritasini tuzgani hamda Zomindagi yong‘inning tafsilotlari aytilgandi.
