Shavkat Mirziyoyev: Marhumlarimizga nisbatan adolatsizliklar bo‘lganidan xabardorman
Ko‘ksaroydagi taqdirlash marosimida o‘zbek adabiyoti va sanʼatining marhum fidoyilari uchun berilgan mukofotlar ularning yaqinlariga topshirildi.
«Bizda marhumlarni taqdirlash tajribasi yo‘q edi. Biz ularni yodga oldik va taqdirlashga qaror qildik.
Marhumlarimizga nisbatan adolatsizliklar bo‘lganidan ham xabardorman. Buni xalqimiz to‘g‘ri qabul qildi, o‘tganlarning ruhi esa o‘ylaymanki shod bo‘ldi. Maʼrifat, o‘zligimizni anglash nuqtayi nazaridan bu to‘g‘ri qaror bo‘ldi desam, fikrimga qo‘shilasizlar deb o‘ylayman.
Botir Zokirov alohida imzo chekishga sazovor inson edi. Bu kishini bilmaydigan birorta o‘zbek xonadoni yo‘q. Otajon Xudoyshukurov bilan shaxsan tanish edim. Sanʼati ham, o‘zi ham baquvvat, lekin o‘zi kamtar inson edi», deya taʼkidladi prezident.
Qo‘shiqchi Botir Zokirov uchun «El-yurt hurmati» ordeni ukasi, qo‘shiqchi Farrux Zokirovga topshirildi.
Aktyor Mirzajon Azizov uchun «Fidokorona xizmatlari uchun» ordeni turmush o‘rtog‘i Tojibar Azizovaga topshirildi.
Qiziqchi Obid Asomov uchun «Fidokorona xizmatlari uchun» ordeni qizi Nargiza Ergashevaga topshirildi.
Qo‘shiqchi Tavakkal Qodirov uchun «Fidokorona xizmatlari uchun» ordeni o‘g‘li Muzrob Qodirovga topshirildi.
Yozuvchi O‘lmas Umarbekov uchun «Fidokorona xizmatlari uchun» ordeni turmush o‘rtog‘i Zuhra Umarbekovaga topshirildi.
Shoira Xalima Xudoyberdiyeva uchun «Fidokorona xizmatlari uchun» ordeni qizi Kamola Umurzoqovaga topshirildi.
Hofiz Faxriddin Umarov uchun «Fidokorona mehnatlari uchun» ordeni uning nabirasi Husniddin Umarovga topshirildi.
Qo‘shiqchi Otajon Xudoyshukurov uchun «Fidokorona xizmatlari uchun» ordeni qizi Intizor Xudoyshukurovaga topshirildi.
Qo‘shiqchi Ortiq Otajonov uchun «Mehnat shuhrati» ordeni o‘g‘li Ulug‘bek Otajonovga topshirildi.
Avvalroq poytaxtdagi Ko‘ksaroy qarorgohida yuksak davlat mukofotiga sazovor bo‘lgan vatandoshlarni taqdirlash marosimida yozuvchi, tarjimon, tanqidchi, O‘zbekiston Qahramoni Ibrohim G‘afurov prezident Shavkat Mirziyoyev haqidagi fikrlarini bildirib o‘tgandi.
