Istanbuldagi ikki yirik ko‘prik O‘zbekiston bayrog‘i ranglarida yoritiladi
Turkiyaning Istanbul shahridagi ikki yirik ko‘prik O‘zbekiston Respublikasi Mustaqilligining 30 yilligiga bag‘ishlab O‘zbekiston bayrog‘i ranglari bilan yoritiladi.
Qayd etilishicha, bugun, 1 sentyabr kuni Fotih Sulton Mehmet hamda Shahidlar ko‘prigi O‘zbekiston bayrog‘ining yashil, ko‘k, qizil va oq ranglariga bezaladi.
Mazkur vizual shouni soat 20:00 dan ertalabga qadar ko‘rish mumkin bo‘ladi.
Avvalroq O‘zbekiston mustaqilligining 30 yilligi sharafiga Malayziya poytaxti hamda AQSH va Kanadaning asosiy diqqatga sazovor joyi, dunyoga mashhur Niagara sharsharasi O‘zbekiston bayrog‘i ranglarida yoritilishi haqida xabar berilgandi.
Eslatib o‘tamiz, 2020 yilda O‘zbekiston mustaqilligining 29 yilligi munosabati bilan Birlashgan Arab Amirliklarining Dubay shahrida joylashgan dunyoning eng baland imorati Burj Xalifada O‘zbekiston bayrog‘i 1 sentyabr kuni 1 daqiqa davomida namoyish etilgandi.
