"Tolibon" harakati Afg‘onistonda yangi hukumat tuzmoqda
Kobul aeroporti ustidan to‘liq nazoratni qo‘lga olgan toliblar yangi hukumat shahli va tarkibi haqida eʼlon qilishga tayyorgarlik ko‘rmoqda.
TOLO News telekanali xabariga ko‘ra, vazirlar mahkamasiga mulla Hibatulla Oxundzoda rahbarlik qilishi mumkin. U hech qachon ommaviy chiqish qilmagan va uning turar joyi doim sir saqlanadi.
Khaama press agentligi esa Tashqi ishlar vaziri mulla Abdul G‘ani Barodar bo‘lishini taxmin qilmoqda. U harakat asoschilaridan biri bo‘lib, hozir “tolibon” siyosiy ofisiga rahbarlik qiladi. “Tolibon”ning birinchi rahbarining o‘g‘li mulla Yoqub mudofaa vaziri, yana bir yetakchi - Jaloliddin Xakkanining o‘g‘li Xalif ichki ishlar vaziri bo‘lishi kutilmoqda.
BMT “tolibon”ni bir necha marta inklyuziv hukumat shakllantirishga chaqirgan. Ammo Al Jazeera telekanali maʼlumotiga ko‘ra, vazirlar mahkamasiga oldingi aʼzolar va ayollar chaqirilmaydi.
“Tolibon” hukumati 3 sentyabrga qadar to‘liq shakllantirilishi kutilmoqda.
Eslatib o‘tamiz, Afg‘oniston Islom Partiyasi rahbari Gulbiddin Hikmatyor “Toliblar inklyuziv hukumat tuzishga tayyor”, deya taʼkidlagandi.
Avvalroq Afg‘oniston sobiq vitse-prezidenti Amrulla Solih “Tolibon” diktaturasiga qarshi ekanini maʼlum qilgan edi.
Sharofat Mahmudova
