Kobulda havoga o‘q uzishi oqibatida 4 kishi halok bo‘ldi

 

 

3-sentyabr kuni toliblar Panjsherni to‘liq egallagani haqida maʼlum qildi. Bu keyinchalik qarshilik harakati vakillari, xususan, Afg‘onistonning sobiq vitse-prezidenti Amrulla Solih tomonidan inkor qilindi. Shunday bo‘lsa-da, “Tolibon” Kobulda butun mamlakat ustidan nazorat o‘rnatilgani sharafiga havoga o‘q otgan. Oqibatda 4 kishi halok bo‘ldi. 

 

Hodisadan so‘ng harakat rasmiy vakili Zabihullo Mujohid askarlarni havoga  o‘t ochmaslikka chaqirdi. Mujohid bu tinch aholiga zarar yetkazishi mumkinligidan ogohlantirgan.

 

“Tolibon” keyinchalik hodisaga aloqador barchani javobgarlikka tortishga vaʼda berdi. Shu mazmundagi bayonotda aytilishicha, o‘q uzgan askarlardan qurol tortib olinadi.

 

“Toliblar yetakchisi o‘rinbosari Muhammad Yoqub havoga o‘q uzganlarga oid bir qator farmonlar chiqardi. Ertadan boshlab Kobul va boshqa shaharlarda o‘t ochganlardan qurol olib qo‘yiladi. Bu kabi xatti-harakatlar g‘aznaga zarar keltiradi va aybdorlar javobgarlikka tortiladi”,- deyiladi bayonotda.

 

Maʼlumot o‘rnida: “Tolibon” 15 avgust kuni Kobul shahrini jangsiz egallagandan keyin butun Afg‘onistonda hokimiyati o‘rnatilganini eʼlon qildi. Hozirda faqatgina Panjsher viloyati toliblar tomonidan nazorat qilinmayapti. Bu yerda Ahmad Masʼud va Afg‘onistonning sobiq vitse-prezidenti Amrulla Solih boshchiligida qarshilik fronti tuzilgan.

 

Eslatib o‘tamiz bundan avval Panjsher viloyatidagi to‘qnashuvlarda 300dan ko‘proq toliblar halok bo‘lgani xabar qilingan edi.