Rossiya hali AQSHdan Koronavirusga qarshi kurash bo‘yicha global sammitda qatnashish uchun taklif olmadi
Rossiya AQSH Prezidenti Jo Bayden taklif qilayotgan Koronavirusga qarshi kurash bo‘yicha global sammitda qatnashish uchun taklif olmagan, dedi Rossiya Prezidenti matbuot kotibi Dmitriy Peskov.
Jurnalistlar bilan suhbat chog‘ida Kreml vakiliga Rossiya BMT Bosh Assambleyasi yig‘ilishi doirasida bo‘lib o‘tadigan ushbu sammitda ishtirok etish uchun Vashingtondan taklif oldimi, degan savolga D. Peskov "Yo‘q, hozircha bu borada hech qanday maʼlumot yo‘q", deb javob berdi.
Peskov, shuningdek, Putin BMT Bosh Assambleyasining joriy sessiyasida qatnashmasligini aytdi.
Bayden maʼmuriyati COVID-19 pandemiyasiga qarshi kurash va global emlash harakatlari bo‘yicha xalqaro sammit o‘tkazishni rejalashtirmoqda. Maʼlumotlarga ko‘ra, Qo‘shma Shtatlar baʼzi mamlakatlarni bu borada xabardor qilgan, ammo hali rasmiy taklifnoma yubormagan.
Qayd etilishicha, sammitni sentyabr oyining oxirgi haftasida BMT Bosh Assambleyasi yig‘ilishi doirasida o‘tkazish rejalashtirilgan.
Avvalroq Rossiya va AQSH yetakchilari uchrashuviga tayyorgarlik ko‘rayotgani to‘g‘risida xabar berilgandi.
Nasiba To‘xtayeva
