BMTning qochqinlar masalasi bo‘yicha Oliy Komissari Afg‘onistonga tashrif buyurdi
BMTning qochqinlar masalasi bo‘yicha Oliy Komissari Kobulga keldi. Bu haqda “Sputnik Afganistan” xabar berdi.
Oliy Komissar Filippo Grandi aeroportda tolib vakillari tomonidan kutib olingan. U bugun tongda Kobulga yetib kelgani, tashrifi davomida mamlakatdagi gumanitar vaziyatga va 3,5 million qochqinlar ahvoliga baho berishini taʼkidlagan.
So‘nggi vaqtlarda afg‘on qochqinlari masalasi BMT diqqat-eʼtiborida. Hozirda Afg‘onistonning turli nuqtalarida BMT va ayrim nohukumat tashkilotlari faoliyat olib bormoqda. Kelayotgan haftada Qochqinlar masalasi komissiyasi jahon hamjamiyatidan Afg‘rniston uchun qo‘shimcha 600 million dollar so‘ramoqchi.
Toliblar hokimiyatni qo‘lga kiritishi ortidan mamlakatda qochqinlar soni keskin ortgan. Ular turli mintaqalarda, xususan, AQSHning Qatar va Germanidagi harbiy bazalarida minglab afg‘onistonliklar joylashtirilgan.
Avvalroq O‘zbekistonga qochib o‘tgan 585 afg‘on uchuvchilari Qatarga jo‘natilishi xabar berilgandi. Shuningdek, NATO qochqinlarga yordam berish maqsadida maxsus kuchlarni jalb qilgandi.
Jahongir Qo‘ziyev
