НАТО афғон қочқинларига ёрдам бериш мақсадида махсус кучларни сафарбар қилди
НАТО афғон қочқинларига ёрдам бериш мақсадида шошилинч чора кўриш кучларини ишга солди.
Маълумотларга кўра, альянс шу мақсадда 300 нафар ҳарбийни сафарбар қилган. Улар қочқинларни вақтинчалик жойлаштириш билан шуғулланади. Шунингдек, ушбу тадбирга НАТО штабининг бошқа юзлаб хизматчилари ҳам жалб қилинган.
Ташкилот ходимлари, энг аввало, Ғарб билан ҳамкорлик қилган афғонлар ва уларнинг оила аъзоларига ёрдам кўрсатади. Уларнинг сони тахминан 1.4 минг кишини ташкил этади. Бу турдаги қочқинлар учун Косово ва Польшада вақтинчалик турар жойлар қурилган.
НАТО шошилинч чора кўриш кучларини сўнгги бор 2005 йилда АҚШдаги “Катрина” тўфони ва Покистонда зилзила рўй берганда сафарбар қилган эди.
Маълумот ўрнида: 15 август куни “Толибон” Кобул шаҳрини эгаллади. АҚШ ҳарбийлари 31 август куни Афғонистонни тўлиқ тарк этди. Ғарб давлатлари 100 мингдан ортиқ афғонистонликни эвакуация қилган.
Эслатиб ўтамиз, бундан аввал АҚШ давлат котиби Энтони Блинкен Афғонистондаги гуманитар инқироз оқибатларини юмшатиш зарурлигини маълум қилган эди.
Жаҳонгир Қўзиев
