Afg‘onistonlik futbolchi qizlar Pokistonga evakuatsiya qilindi

 

 

Pokiston axborot vaziri Favad Chaudrining so‘zlariga ko‘ra, Afg‘onistonning futbol bo‘yicha ayollar jamoasi Islomobodga yetib kelgan. “Afg‘on futbolchi qizlarini xush ko‘rdik, ular “Torxam” chegara nazorat punktiga keldi”, – degan vazir.

 

Bir necha kun avval “Tolibon”ning madaniyat masalalari bo‘yicha komissiya aʼzosi Ahmadullo Vosiq ayollarning sport bilan shug‘ullanishi taqiqlanganini maʼlum qilgan.

 

Ayollar masalasi Afg‘oniston ichki siyosatida eng og‘ir masalalardan biri bo‘lib turibdi. Toliblar xotin-qizlar huquqini himoya qilishga vaʼda bersa-da, amalda turli viloyatlarda ularning faoliyati cheklanmoqda. Afg‘onistonning bir qancha faol ayollari mamlakatdan chiqib ketgan. Masalan,“Tolibon” hokimiyatga kelgandan so‘ng ulardan ilk intervyu olgan ayol boshlovchi keyinchalik mamlakatni tark etdi. Mamlakatning turli viloyatlarida “Tolibon” siyosatiga qarshi ayollar namoyishi bo‘lib o‘tgan.

 

Shunday bo‘lsa-da, harakat xotin-qizlarning turli sohalar, eng avvalo, tibbiyot va taʼlim sohasida ishlashiga ruxsat berdi. Shuningdek, 15 sentyabr kuni Kobul xalqaro aeroportiga ayollar ishga chiqdi. Hozirda ular 30 nafar, kelgusida  60 ga yetishi kutilyapti.

 

Maʼlumot o‘rnida: 15 avgust kuni “Tolibon” harakati Kobulni egallagan.31 avgustda AQSH Afg‘onistonni to‘liq tark etdi. Harakat tomonidan egallanmagan yagona viloyat Panjsher edi. Ammo 6 sentyabrda ushbu hudud ham “Tolibon” nazoratiga o‘tdi.  Shundan keyin toliblar 7 sentyabr kuni mamlakatning yangi hukumati tuzilganini eʼlon qildi.

 

 

Jahongir Qo‘ziyev