Madaniyatlar yaqinlashuvi xalqlarni birlashtirishga imkon yaratadi — Sodiq Safoyev
Shu kunlarda mamlakatimizning Toshkent, Nukus va Xiva shaharlarida O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyatining «O‘zbekiston madaniy merosi — Yangi Renessans poydevori» V Kongressi bo‘lib o‘tmoqda. Unda dunyoning 40 dan ortiq mamlakatidan 350 dan ziyod yetakchi sharqshunos, qurʼonshunos, ekspert va tadqiqotchilar, qo‘lyozma va miniatyuralar bo‘yicha mutaxassislar ishtirok etyapti.
Sodiq Safoyev, Oliy Majlis Senati Raisining birinchi o‘rinbosari:
— Kongress ishida butun dunyodan vakillar — mutaxassis-olimlar, ekspertlar ishtirok etayotgani katta ahamiyatga ega. Prezidentimiz “Yangi O‘zbekiston” gazetasiga bergan intervyusida milliy o‘zlikni anglash, eng avvalo, jamiyat taraqqiyoti va yuksalishiga asos yaratadi, degan edi. Bugungi xalqaro anjuman ayni shu maqsadga qaratilgani va xizmat qilishi bilan ahamiyatlidir.
Bugun biz shiddat bilan rivojlanayotgan ziddiyatli dunyoda yashayapmiz. O‘zingiz guvoh bo‘lganingizdek, butun dunyoda, jumladan, mintaqamizda ziddiyatlar, havf-xatarlar ortib bormoqda. Men o'ylaymanki, dunyoning bugungi asosiy muammosi bu o‘zaro ishonchning yo‘qligi. Yaʼni xalqlar madaniyatini, o‘zaro bir-birini tushunishning tanqisligidir. Buning uchun, birinchi navbatda, biz madaniy yuksalikka erishishimiz kerak. Madaniyatlar yaqinlashuvi xalqlarni birlashtirish va yaqinlashtirishga imkon yaratadi.
Turli qo‘poruvchi guruh, teroristik oqimlarni hech qachon muayyan din bilan bog‘lamaslik kerak. teroristik guruhlarga qo‘shilishning asosiy omili diniy eʼtiqod emas. Aksincha, biz xalqlar sivilizatsiyalarini chuqur bilishimiz, bu boradagi yanglish tushunchalarni bartaraf qilish bilan shug‘ullanishimiz kerak. Bugungi anjuman ana shunday maqsadga qaratilgan. Unda Avstraliyadan tortib Amerikagacha bo‘lgan mintaqa vakillari ishtirok etyapti. Bu kabi aloqalar hamkorlikdagi faoliyatning umumiy strategiyasini ishlab chiqishga yordam beradi, albatta. Bunday tadbirlar, birinchi navbatda, O‘zbekiston salohiyatni anglash, keng omaga targ‘ib qilish, ikkinchidan, butun bashariyat uchun kerak bo‘lgan o‘zaro tushunish va ishonch muhitini yaratishga xizmat qiladi.
— Siz Butunjahon jamiyatining deyarli barcha tadbirlarida qatnashib kelasiz. Uning tadrijiy rivojlanishi va salohiyati haqida nima deya olasiz?
— Buning uchun Kongress doirasida namoyish etilayotgan O‘zbekiston tarixi va madaniyatiga oid dunyo davlatlari muzeylaridan topib olib kelingan o‘ta noyob eksponatlar, miniatyuralar, noyob kitoblarga eʼtibor qaratish kifoya, deb o‘ylayman. Ular ishtirokchilarni o‘ziga maftun qilishi shubhasiz. Bular 5 yil mobaynida tashkilotchilar tomonidan madaniy merosini qaytarib kelish, o‘rganish, targ‘ib etish borasida qilinayotgan ulkan ishlarning yorqin namunasidir.
Avvalroq, O‘zbekiston Respublikasi Prezidenti Shavkat Mirziyoyev tomonidan Xiva shahrida tashkil etilayotgan “Markaziy Osiyo jahon sivilizatsiyalari chorrahasida” madaniy forumi doirasida o‘tgan O‘zbekiston madaniy merosini o‘rganish, saqlash va ommalashtirish bo‘yicha Butunjahon jamiyatining kongressida yurtimizda amalga oshirilayotgan keng miqyosli islohotlarga va ayniqsa madaniy meros va maʼnaviyatga davlat miqyosida berilayotgan ulkan eʼtibor alohida eʼtirof etilgani haqida xabar bergan edik.
Munojat Valiyeva
